साताऱ्यातील सर्व्हिसिंग सेंटरमध्ये कॉम्प्रेसरचा स्फोट:एक जण जागीच ठार, दोन गंभीर जखमी

साताऱ्यातील माची पेठ परिसर मंगळवारी दुपारी सर्व्हिसिंग सेंटरमधील कॉम्प्रेसरच्या स्फोटाने हादरला. या स्फोटात एक जागीच ठार, तर दोनजण गंभीर जखमी झाले आहेत. या स्फोटामुळे आजुबाजूच्या घरांतील खिडक्यांच्या काचा फुटल्या. मुनीर पालकर (वय ३५, रा. गुरुवार परज, सातारा), असं मृताचं तर हारूण बागवान आणि उमर बागवान, अशी गंभीर जखमींची नावे आहेत. सातारा शहरातील माची पेठेत अदालत वाड्याजवळ असलेल्या सर्व्हिसिंग सेंटरमध्ये भरदुपारी भीषण स्फोट झाला. स्फोटानंतर आसमंतात पांढऱ्या रंगाचे लोट पसरले. स्फोट एवढा जबरदस्त होता की सर्व्हिसिंग सेंटरच्या बाजूच्या दुकानात बसलेल्या तिघांपैकी मुनीर बागवान हा ३० फूट दूरवर उडाला आणि डांबरी रस्त्यावर पडला. त्याच्या शरीराच्या चिंधड्या उडाल्याने त्याचा जागीच मृत्यू झाला. कॉम्प्रेसरचा स्फोट शॉर्टसर्किटने झाला की वाहनात गॅस भरताना झाला, हे स्पष्ट झालेलं नाही. सर्व्हिसिंग सेंटरलगतच्या दुकानात बसलेले आणखी दोघे जण या स्फोटात गंभीररित्या जखमी झाले आहेत. रक्तबंबाळ अवस्थेत त्यांना रुग्णालयात नेण्यात आलं. घटनास्थळाच्या परिसरात रक्ताचा सडा पडला होता. दरम्यान, एकापाठोपाठ सलग दोन स्फोट झाल्याचं काही प्रत्यक्षदर्शींनी सांगितलं. स्फोटानंतर हवेत पांढऱ्या रंगाचे लोट पसरले होते. घटनेनंतर बघ्यांची मोठी गर्दी झाल्यानं पोलिसांनी समर्थ मंदिर ते पोवई नाका रस्ता बंद केला. बाँब शोधक, नाशक पथक आणि सातारा शहर पोलिस या स्फोटाचा तपास करत आहेत.

Share

-