मालदीवचे परराष्ट्र मंत्री म्हणाले- भारतासोबतचे संबंध सुधारले:दोन्ही देशांमध्ये गैरसमज दूर झाले; राष्ट्राध्यक्ष मुइज्जू लवकरच भारत दौऱ्यावर येणार

भारताचे संबंध सुधारतील असे मालदीवचे परराष्ट्र मंत्री मुसा जमीर यांनी म्हटले आहे. दोन्ही देशांमधील गैरसमज दूर झाल्याचे मुसा यांनी सांगितले. मालदीवमध्ये राष्ट्राध्यक्ष मोहम्मद मुइज्जू यांचे सरकार स्थापन झाल्यानंतर दोन्ही देशांमधील संबंध बिघडल्याचे त्यांनी मान्य केले. मुइज्जू यांनी भारताकडे मालदीवमधून सैन्य मागे घेण्याची मागणी केल्यानंतर संबंध चांगले नसल्याचे मुसा यांनी सांगितले. श्रीलंका दौऱ्यावर असताना शुक्रवारी द एडिशन वृत्तपत्राशी बोलताना मुसा यांनी हे वक्तव्य केले. याशिवाय दक्षिण आशियातील आपल्या मित्र राष्ट्रांशी, विशेषत: भारत आणि चीन यांच्याशी संबंध दृढ करण्याबाबतही त्यांनी चर्चा केली. मुइज्जू राष्ट्रपती झाल्यानंतर भारत-मालदीव तणाव वाढला
नोव्हेंबर 2023 मध्ये मुइज्जू यांनी सत्ता हाती घेतल्यानंतर दोन्ही देशांमध्ये तणाव निर्माण झाला होता. मुइज्जू राष्ट्रपती होण्यापूर्वीच मालदीवमधून भारतीय सैन्य हटवण्याची मागणी करत होते. ४५ वर्षीय मुइज्जू यांनी निवडणुकीत भारत समर्थक उमेदवार मोहम्मद सोलिह यांचा पराभव केला होता. भारताने आपले सैन्य मागे न घेतल्यास मालदीवमधील लोकांच्या लोकशाही स्वातंत्र्याचा अपमान होईल, असे मुइज्जू म्हणाले होते. मुइज्जू यांनी भारतीय सैन्याच्या उपस्थितीला मालदीवमधील लोकशाहीच्या भवितव्यासाठी धोका असल्याचेही सांगितले होते. ते म्हणाले की, संसदेच्या परवानगीशिवाय दुसऱ्या देशाचे सैन्य देशात असणे संविधानाच्या विरोधात आहे. मुइज्जू त्यांच्या पहिल्या राज्यभेटीवर चीनला गेले होते. याआधी मालदीवचे प्रत्येक राष्ट्रपती आपली पहिली भेट फक्त भारतालाच करायचे. चीन समर्थक मुइज्जू लवकरच भारतात येणार
मुइज्जू लवकरच भारताच्या पहिल्या अधिकृत दौऱ्यावर येणार आहेत. मुइज्जू यांच्या प्रवक्त्याने 10 सप्टेंबर रोजी ही माहिती दिली. मात्र, त्याची तारीख अद्याप ठरलेली नाही. तत्पूर्वी, मुइज्जू​​​​​​​ 9 जून रोजी पंतप्रधान मोदींच्या शपथविधीला उपस्थित राहण्यासाठी भारतात आले होते. बिझनेस टुडेच्या रिपोर्टनुसार, भारताने मालदीवला आर्थिक मदत देऊ केली आहे. भारतीय अधिकाऱ्यांच्या म्हणण्यानुसार, मालदीव भारतीय रिझर्व्ह बँकेच्या करन्सी स्वॅप कार्यक्रमांतर्गत तात्काळ $400 दशलक्ष मिळवू शकतात. हा कार्यक्रम प्रादेशिक देशांना मदत पुरवतो. मालदीवच्या अध्यक्षपदाची सूत्रे हाती घेतल्यानंतर मुइज्जू यांनी देशात चीनला लाभदायक धोरणे राबवण्यास सुरुवात केली आणि आपल्या पारंपारिक भागीदार भारतापासून दूर राहण्यास सुरुवात केली. मात्र, कर्जबाजारीपणा वाढल्यानंतर मोहम्मद मुइज्जू पुन्हा एकदा भारताशी संबंध सुधारण्याचा प्रयत्न करत आहेत.