Amit Shah : अमित शाहांच्या मुंबई दौऱ्यात मनसे-भाजप युतीचा नारळ फुटणार?

मुंबई : केंद्रीय गृहमंत्री आणि भाजपचे दिग्गज नेते अमित शाह (Amit Shah) ५ सप्टेंबर रोजी मुंबई दौऱ्यावर येणार आहेत. यावेळी भाजप-मनसे युतीचा नारळ फुटणार असल्याची चर्चा आहे. गेल्या काही काळापासून मनसे अध्यक्ष राज ठाकरे (Raj Thackeray) आणि भाजप नेत्यांची जवळीक वाढताना दिसत आहे. शिंदे गटाची शिवसेना आणि भाजप यांनी एकत्र सत्ता स्थापन केली आहेच, आता या युतीची ‘महायुती’ होण्याची शक्यता वर्तवली जात आहे. शिंदे-भाजप-मनसे या तीन पक्षांची हिंदुत्वाच्या मुद्द्यावर एकी होण्याची चिन्हं आहेत.

अमित शाह ५ सप्टेंबर रोजी मुंबईत येणार आहेत. यंदा गणेशोत्सवावर कोणतेही निर्बंध नसल्याने ते लालबागचा राजा आणि सिद्धिविनायकाचे दर्शन घेतील. त्यानंतर मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि भाजपचे मुंबई अध्यक्ष आशिष शेलार यांच्या निवासस्थानीही गणपती बाप्पाचे दर्शन घेणार असल्याची माहिती आहे.

विशेष म्हणजे, अमित शाह यावेळी मुंबई महापालिकेच्या दृष्टीने एक महत्त्वपूर्ण बैठक घेणार आहेत. मोजक्या पदाधिकाऱ्यांच्या उपस्थितीत ही बैठक होणार असल्याचे कळते. गेली २५ वर्ष मुंबई महापालिक असलेली शिवसेनेची सत्ता उलथवण्यासाठी भाजप सर्वतोपरी प्रयत्न करत आहे. शाहांच्या मुंबई दौऱ्याच्या निमित्ताने ‘मिशन मुंबई महापालिका’चा शुभारंभ होणार असल्याचे समजते.

काँग्रेस-राष्ट्रवादीशी हातमिळवणी करत शिवसेना पक्षप्रमुख उद्धव ठाकरे हिंदुत्व विसरल्याची टीका शिंदे गटातील आमदार-खासदार, भाजप नेते आणि मनसेकडूनही केली जाते. अगदी राज ठाकरे आपल्या भाषणातही शिवसेनेवर हल्लाबोल चढवताना दिसतात. अनेकदा ते भाजपची बाजू घेऊन बोलताना दिसल्यामुळे मनसे भाजपशी युती करणार असल्याच्या चर्चांना पेव फुटले.

गेल्या काही दिवसात उपमुख्यमंत्री देवेंद्र फडणवीस, भाजप प्रदेशाध्यक्ष चंद्रशेखर बावनकुळे, माजी मंत्री विनोद तावडे यांची राज ठाकरेंशी भेट झाली होती. मुंबई महापालिका निवडणुका अगदी तोंडावर आहेत. त्याचप्रमाणे औरंगाबाद, पुणे, पिंपरी चिंचवड, नाशिक अशा महापालिकांच्या निवडणुकाही होणार आहेत. त्यामुळे ठाकरेंना शह देण्यासाठी तिघे जण एकत्र येण्याची शक्यता आहे. शिवसेनेची मतपेटी फोडण्यासाठी भाजप मनसेला जवळ खेचत असल्याच्या चर्चा नवीन नाहीत. कालच्या शिंदे-राज ठाकरे भेटींनी तीन पक्षांच्या महायुतीच्या चर्चांनाही जोर आला आहे.

Leave a Comment

Your email address will not be published.