भाजप लोकसभेला भाकरी फिरवणार, २२ खासदारांचा पत्ता कट होणार? नव्या चेहऱ्यांना संधी देत मोठा डाव टाकण्याचा प्लॅन
BJP News : गुजराती भाजपची प्रयोगशाळा मानले जाते. भाजप आपल्या सर्वात मजबूत अशा बालेकिल्ल्यात सातत्याने प्रयोग करत आलं आहे. यावेळी आगामी लोकसभा निवडणुकीत नवा प्रयोग होण्याची शक्यता आहे.
अहमदाबाद : २०२४ च्या लोकसभा निवडणुकीला एक वर्ष बाकी असतानाच भाजपने जोरदार तयारी सुरू केली आहे. भाजप सातत्याने धक्का तंत्रासाठी ओळखलं जातं. गेल्या काही वर्षांपासून भाजपचा बालेकिल्ला असलेल्या गुजरातमध्येच यावेळी धक्का तंत्राचा वापर होण्याची शक्यता आहे. भाजप त्यांच्या २२ खासदारांचा आगामी निवडणुकीत पत्ता कट करण्याची शक्यता आहे. गुजरातमध्ये एकूण लोकसभेच्या २६ जागा आहेत. २०१४ आणि २०१९ च्या लोकसभा निवडणुकीत भाजपने सर्व जागांवर विजय मिळवला तर काँग्रेसला एकाही जागेवर विजय मिळवता आला नाही. २००९ मध्ये काँग्रेसने ११ जागी तर भाजपने १५ जागांवर विजय मिळवला होता. आगामी २०२४ च्या लोकसभा निवडणुकीत सर्व जागा जिंकण्याचा भाजपचा प्रयत्न आहे. त्यामुळे विद्यमान खासदारांचा पत्ता कट करून नव्या चेहऱ्यांना संधी देण्याचा भाजपचा प्रयत्न असल्याचे बोलले जात आहे.
भाजपच्या सूत्रांच्या आधारे मीडियात आलेल्या रिपोर्टनुसार २६ पैकी २२ खासदारांचा पत्ता कट होण्याची शक्यता आहे. त्या ठिकाणी भाजप नव्या चेहऱ्यांना संधी देण्याची शक्यता आहे. २०१९ च्या निवडणुकीप्रमाणे भाजप काही आमदारांना लोकसभेचे तिकीट देण्याची शक्यता आहे. याशिवाय इतर पक्षातून भाजपमध्ये आलेल्या नेत्यांना देखील उमेदवारी मिळू शकते. काँग्रेस मधून भाजपमध्ये आलेल्या नेत्यांना देखील लोकसभेची उमेदवारी मिळण्याची शक्यता यामुळे निर्माण झाली आहे.केंद्रीय मंत्री मनसुख मांडवीय आणि पुरुषोत्तम रूपाला यांना देखील यावेळी लोकसभा निवडणूक लढवावी लागेल अशी शक्यता आहे. सध्या दोघे देखील राज्यसभेत आहेत. भाजप दोघांनाही पुन्हा राज्यसभेत संधी देण्याची शक्यता कमी आहे. भाजपनं नगरपालिकेतील नाराजी दूर करण्यासाठी एकदा सर्व नगरसेवकांची तिकीटं कापली होती. तो फॉर्मुला यशस्वी ठरला होता त्यानंतर भाजपने पुढील सर्व निवडणुकांमध्ये मोहरीतील धोरण राबवला आहे त्यांची कामगिरी चांगली नसेल त्यांना भाजपमध्ये उमेदवारी दिली जात नाही.
