भारताने टी-२० विश्वचषकाच्या उपांत्य फेरीत प्रवेश केला आहे. ५ मार्च रोजी मुंबईतील वानखेडे स्टेडियमवर संघ इंग्लंडशी सामना करेल. सुपर ८ च्या शेवटच्या सामन्यात भारताने वेस्ट इंडिजचा ५ विकेट्सने पराभव करून अंतिम चारमध्ये स्थान निश्चित केले. संजू सॅमसनने सर्वाधिक ९७ धावा केल्या. कोलकात्यातील ईडन गार्डन्सवर खेळल्या गेलेल्या सामन्यात वेस्ट इंडिजने प्रथम फलंदाजी करताना २० षटकांत ४ बाद १९५ धावा केल्या. रोस्टन चेस (४०) आणि जेसन होल्डर (नाबाद ३७) यांनी महत्त्वपूर्ण योगदान दिले, तर जसप्रीत बुमराहने दोन विकेट्स घेतल्या. १९६ धावांच्या लक्ष्याचा पाठलाग करताना भारताची सुरुवात डळमळीत झाली. अभिषेक शर्मा आणि इशान किशन प्रत्येकी १० धावांवर बाद झाले. तिलक वर्माने १५ चेंडूत २७ धावा केल्या, तर कर्णधार सूर्यकुमार यादवने १६ चेंडूत १८ धावा केल्या. दरम्यान, संजू सॅमसनने एका बाजुने लढा कायम ठेवला. त्याने ५० चेंडूत ४ षटकार आणि १२ चौकारांसह नाबाद ९७ धावा केल्या.