वजन कमी करणारे इंजेक्शन आणि औषधे आता केवळ आरोग्याचा विषय राहिलेली नाहीत. ती लोकांचे खिसे, बाजार आणि व्यावसायिक धोरणे (बिझनेस स्ट्रॅटेजी) बदलत आहेत. ब्रिटनमध्ये 2024 दरम्यान सुमारे 16 लाख लोकांनी लठ्ठपणा कमी करण्यासाठी जीएलपी-1 इंजेक्शन वापरले. भूक कमी झाल्यामुळे लोक कमी खातात, पण अधिक विचारपूर्वक. परिणामी - खाण्यापासून ते कपडे, दारू, जिम आणि सौंदर्य उद्योगापर्यंत (ब्यूटी इंडस्ट्री) खर्चाचे स्वरूप बदलत आहे. एका वर्षात 25 किलोपेक्षा जास्त वजन कमी करणारे इंग्लंडचे 38 वर्षीय सॅम गिल्सन सांगतात, ‘आता माझी किराणा खरेदी कमी झाली आहे, पण ताजे आणि पौष्टिक अन्न जास्त खरेदी करतो.’ हाच ट्रेंड लक्षात घेऊन को-ऑप, मॉरिसन्स आणि मार्क्स अँड स्पेन्सर यांसारख्या सुपरमार्केट्सनी पोषक तत्वे - खनिजे (मिनरल्स) आणि प्रथिने (प्रोटीन) यांनी समृद्ध तयार अन्न, लहान पॅकमध्ये लॉन्च केले आहे. बाजारात आता प्रोटीनयुक्त स्नॅक्स आले आहेत. खाद्य संशोधन कंपनी मिंटेलचे जॉनी फॉर्सिथ यांच्या मते, ‘ही औषधे पौष्टिक आहाराच्या सध्याच्या ट्रेंडला गती देत आहेत.’ बाहेर खाण्यात कपात रिसर्च कन्सल्टन्सी केएएम इनसाइटच्या सर्वेक्षणानुसार, जीएलपी-1 वापरकर्त्यांपैकी सुमारे एक तृतीयांश लोकांनी बाहेर खाणे कमी केले आहे. कॉर्नवॉलच्या 70 वर्षीय ॲनी हॅसलम म्हणतात, ‘मी आधी आठवड्यातून एकदा रेस्टॉरंटमध्ये जात असे. आता अनेक महिन्यांपासून गेले नाही.’ हा परिणाम फास्ट फूडपासून ते फाइन डायनिंगपर्यंत दिसत आहे. ग्रेग्ससारख्या बेकरी चेन आणि मिशेलिन-स्टार रेस्टॉरंट्सही लहान आणि मोजक्या मेन्यूवर काम करत आहेत. ग्राहक डेटा प्लॅटफॉर्म वर्ल्डपॅनेल बाय न्यूमरेटरनुसार, जीएलपी-1 वापरणाऱ्या कुटुंबांमध्ये दारूची खरेदी 15% पर्यंत कमी झाली आहे. वजन कमी झाल्यावर कपडेही वेगाने बदलत आहेत. वेगाने वजन कमी झाल्यामुळे जुने कपडे सैल होतात. अशा परिस्थितीत नवीन कपडेही खरेदी केले जात आहेत. मार्केट एक्सपर्ट डॅन कोट्सवर्थ यांचे मत आहे की, यामुळे फॅशन क्षेत्राला चालना मिळाली आहे. जिम, ब्युटी आणि वेलनेस व्यवसायही वाढला आहे. जिम ग्रुपचे सीईओ विल ऑर यांच्या मते, इंजेक्शन घेणारे लोक स्नायू वाढवण्यासाठी जिममध्ये जात आहेत. ब्रिटिश असोसिएशन ऑफ एस्थेटिक प्लास्टिक सर्जन्सच्या मते, 2024 मध्ये फेसलिफ्टची मागणी 8% वाढली.