या महिन्यात ग्लोबल फॅशन मॅगझिन व्होगने असे काही केले, जे त्यांनी यापूर्वी कधीच केले नव्हते. त्यांनी आपल्या कव्हरवर दोन ७६ वर्षीय महिलांना स्थान दिले. फॅशन मॅगझिनच्या कव्हरवरील वयाचा अडथळा दूर करून व्होगने स्वतःला जुने नाही तर समकालीन सिद्ध केले आहे किंवा किमान फॅशन जगतात तरी असेच वाटू लागले आहे. इंडस्ट्रीशी संबंधित लोकांच्या मते, फॅशन जगतात सीनियर मॉडेल्सना इतके महत्त्व यापूर्वी कधीही मिळाले नव्हते. फॅशनच्या जगाच्या भाषेत, सीनियर असण्याचा अर्थ ३० वर्षांपेक्षा जास्त वय असणे असा लावला जातो. फॅशन सर्च इंजिन टॅगवॉकच्या आकडेवारीनुसार, जगातील टॉप २० ब्रँड्सनी रनवे शोमध्ये प्लस-साइज मॉडेल्सव्यतिरिक्त जास्त वयाच्या मॉडेल्सचा समावेश केला. गेल्या महिन्यात झालेल्या एका फॅशन शोची सुरुवात ५० वर्षीय स्टेफनी कॅव्हली यांनी केली, ज्या रॅम्पवर ४० पेक्षा जास्त वयाच्या १५ मॉडेल्सपैकी एक होत्या. बोटेगा वेनेटात नऊ सीनियर मॉडेल्स होत्या. टॉम फोर्डमध्ये नऊ, गिव्हेंचीत आठ, बालेन्सियागात पाच व लुई व्हितामध्ये चार सीनियर मॉडेल्स सहभागी झाल्या. वाढत्या सिल्व्हर इकॉनॉमीचा फायदा घेण्याचा प्रयत्न फॅशन इंडस्ट्रीचा हा बदल श्रीमंत वृद्धांना (ज्याला सिल्व्हर इकॉनॉमी म्हणतात) आकर्षित करण्याचा प्रयत्न आहे. अमेरिकेच्या एकूण संपत्तीपैकी ७०% संपत्ती ५५ वर्षांहून अधिक वयाच्या लोकांकडे आहे. मॅकिन्से कन्सल्टिंग फर्ममध्ये फॅशन रिटेल प्रॅक्टिसच्या ग्लोबल को-लीडर जेम्मा डी’ऑरिया म्हणतात, ‘जेव्हा लक्झरी उत्पादनांची वाढ मंदावली आहे, तेव्हा एका प्रमुख ग्राहक समूहाकडे दुर्लक्ष करणे हे अजिबात चांगले धोरण नाही.’ फॅशनच्या जगापलीकडेही नवा ट्रेंड, वय लपवण्याऐवजी दाखवण्याची पद्धत फॅशनच्या जगापलीकडेही एक नवा ट्रेंड रुजत आहे. यामध्ये फॅशन जगत किंवा त्याच्याशी संबंधित लोक आपले वय लपवण्याऐवजी ते उघड करणे पसंत करतात. माजी सुपरमॉडेल आणि सध्या एस्टी लॉडरच्या ॲम्बेसेडर असलेल्या ६१ वर्षीय पॉलिना पोरिझकोव्हा इन्स्टाग्रामवर याचे नेतृत्व करत आहेत. त्या आपल्या १४ लाख फॉलोअर्ससोबत विना मेकअप असलेल्या फोटोंच्या माध्यमातून आपल्या सुरकुत्या आणि वाढलेले वजन दाखवतात. हा त्या इंडस्ट्रीतील एक धक्कादायक बदल आहे जी दीर्घकाळापासून तारुण्याच्या उदात्तीकरणासाठी प्रसिद्ध राहिली.