वारकऱ्यांच्या आस्थेच्या इंचभर दगडालाही हात लागला तर सहन करणार नाही:पंढरपूर कॉरिडॉर विकास प्रकल्पाला अमोल मिटकरींचा विरोध, महायुतीत मतभेद

पंढरपूर कॉरिडॉर विकास प्रकल्प राज्य सरकारतर्फे करण्यात येणार आहे. मात्र या प्रकल्पाला महायुती सरकारमधील घटकपक्षांमध्ये मतभेद असल्याचे समोर आले आहे. पंढरपूर विकास प्रकल्पाला राष्ट्रवादी कॉंग्रेस अजित पवार गटाचे आमदार अमोल मिटकरी यांनी तीव्र विरोध दर्शवला आहे. हा प्रकल्प करताना होळकर वाडा, शिंदे सरकार वाडा, नामदेव पायरी यांच्यासह अनेक मंदिरांना पाडावे लागणार असल्याने याला अमोल मिटकरी यांनी विरोध केला आहे. अमोल मिटकरी म्हणाले, पंढरपुरातील ऐतिहासिक आणि धार्मिक वास्तूंना हात न लागतं विकास होणार असेल तर आपली त्याला हरकत नसेल. मात्र, पंढरपूरमधील वारकऱ्यांची आस्था असलेल्या इंचभर दगडालाही हात लागला तर आम्ही ते सहन करणार नाही, असा इशारा अमोल मिटकरी यांनी दिला आहे. पुढे बोलताना अमोल मिटकरी म्हणाले, पंढरपूर कॉरिडॉर प्रकल्प करताना होळकर वाडा, शिंदे सरकार वाडा, नामदेव पायरी यांच्यासह अनेक मंदिरांना पाडावे लागणार आहे. ही गोष्ट वारकऱ्यांच्या आस्थेची असल्याने आपला त्याला विरोध आहे. काशी, उज्जैन आणि वाराणसीच्या धर्तीवर पंढरपूरचा विकास करण्याचा सरकारचे धोरण आहे. मात्र, पंढरपूर या देवस्थानांपेक्षा सर्वार्थाने वेगळे असल्याने येथील विकासाची तुलना पंढरपूरशी करता येणार नाही. पंढरपुरातील ऐतिहासिक आणि धार्मिक वास्तूंना हात न लागता विकास होणार असेल तर आपली त्याला हरकत नसेल. मात्र, पंढरपुरातील वारकऱ्यांची आस्था असलेल्या इंचभर दगडालाही हात लागला तर आम्ही ते सहन करणार नाही, असा इशारा देखील अमोल मिटकरी यांनी दिला आहे. त्यामुळे आता या प्रकल्पाबाबत सरकार काय निर्णय घेणार तसेच कोणता तोडगा काढला जाणार याकडे पाहणे महत्त्वाचे असणार आहे. दरम्यान, श्री विठ्ठल रूक्मिणी मंदिराचे जतन व संवर्धन करण्याचे काम सुरू असून या अंतर्गत संत नामदेव पायरीवरील पितळी दरवाजा चांदीचा बनविण्याचा ठराव मंदिर समितीच्या बैठकीमध्ये करण्यात आला होता. नांदेड येथील अरगुलकर परिवाराच्यावतीने सदर दरवाजास चांदी बसवून देण्यात येत आहे.