News Image

भुजबळांकडून 'फुले' चित्रपटाचे समर्थन:विरोधकांना इतिहास समजून घेण्याची विनंती; फुले दाम्पत्याचे काम जगभरात जाऊ देण्याचे आवाहन


महात्मा फुलेंना केवळ ब्राह्मणांनीच नाही तर आमच्याही लोकांनी विरोध केला. ब्राह्मण समाजाच्या अनेक लोकांनी त्यांना मोलाची मदत केली. त्यामुळे सिनेमाला विरोध करण्यापेक्षा तेव्हाचा इतिहास समजून घ्या. फुले चित्रपट लवकर प्रदर्शित होऊ द्या. महात्मा फुले व सावित्रीबाईंचे काम जगभरात जाऊ द्या, असे आवाहन राष्ट्रवादी काँग्रेसचे ज्येष्ठ नेते छगन भुजबळ यांनी शुक्रवारी फुले चित्रपटाला विरोध करणाऱ्यांना केले. उच्च व तंत्र शिक्षण विभाग, महात्मा ज्योतिबा फुले चरित्र साधने प्रकाशन समिती यांच्यातर्फे महात्मा फुले समग्र वाड्मय या पुनर्मुद्रित ग्रंथाचा वितरण समारंभ आणि महात्मा फुले जयंती निमित्त अभिवादन कार्यक्रमाचे पुण्यात आयोजन करण्यात आले होते. या कार्यक्रमाला मंत्री चंद्रकांत पाटील आणि आमदार छगन भुजबळ यांनी हजेरी लावली होती. यावेळी बोलताना भुजबळांनी उपरोक्त आवाहन केले. ते म्हणाले, आज आनंदाची गोष्ट होत आहे. हा वाडा ज्यात ही विहीर आहे. त्यावेळचे मागास ज्यांना आपण प्यायला पाणी देत नव्हतो, तेव्हा फुलेंनी ही विहीर सर्वांसाठी खुली केली. ते त्यांच्यासोबत जेवले. सर्व महिलांना आधार दिला. सर्वांना सांभाळले. त्यांनी गरोदर महिलांनाही आधार दिला. त्यावेळी महात्मा फुले व सावित्रीबाई फुले यांनी पुण्यात पोस्टर्स लावून म्हटले होते की, गरोदर महिलांनी आत्महत्या करू नये. आम्ही तुमचे आई-वडील आहोत. आमच्याकडे या. आम्ही तुमचे बाळंतपण करतो. आजही जे शक्य नाही, ते त्यांनी तेव्हा केले होते. भिडे वाड्यातून क्रांतीचे पाणी पेटले छगन भुजबळ यांनी यावेळी भिडे वाड्याच्या इतिहासाची सर्वांना आठवण करून दिली. ते म्हणाले, भिडे वाड्याला फार मोठा इतिहास आहे. क्रांतीचे पाणी येथूनच पेटले होते. जगातील पहिली क्रांती या वाड्यातून झाली. आपण हा इतिहास विसरत आहोत हे दुर्दैव आहे. केवळ ब्राह्मणच नव्हे तर आमच्यातीलही अनेकांनी फुलेंना विरोध केला होता. तर अनेक ब्राह्मणांनी त्यांना मदतही केली होती. अटलबिहारी वाजपेयी म्हणाले होते की, इतिहास तुम्हाला माहिती पाहिजे. इतिहास ज्ञात असल्याशिवाय तुम्ही भविष्य घडवू शकत नाही. महात्मा ज्योतिबा फुले व सावित्रीबाई फुले यांचा लढा ब्राह्मणांच्या विरोधात नव्हता. अंधश्रद्धेच्या व ब्राह्मणवादाच्या विरोधात होता. फुले चित्रपट प्रदर्शित होऊ द्या छगन भुजबळ यांनी यावेळी फुले चित्रपटावरून निर्माण झालेल्या वादावरही भाष्य केले. ते म्हणाले, फुले चित्रपटाला काही लोक विरोध करत आहेत. चित्रपट बनवणारे लोक आम्ही जे सत्य आहे तेच मांडल्याचा दावा करत आहेत. माझी सर्वांना विनंती आहे. त्यावेळी जी परिस्थिती होती, तशी आज नाही. आज सर्वकाही बदलले आहे. सिनेमाला विरोध करण्यापेक्षा त्यावेळचा इतिहास समजून घ्या. सिनेमाला विरोध करू नका. हा चित्रपट लवकर प्रदर्शित होऊ द्या. महात्मा फुले व सावित्रीबाईंचे काम जगभरात जाऊ द्या. सरकारला आंदोलन करण्याचा इशारा भिडे वाड्यासाठी अजित पवारांनी 200 कोटींचा निधी मंजूर केला आहे. एकनाथ शिंदे यांनीही 100 कोटी रुपये पाठवून दिले आहेत. त्यांनी काम सुरू करण्याचे आदेश दिले. पण काम सुरू झाले नाही. जागा कमी पडत आहे. भिडे वाड्याची काम लवकर सुरू करा. मला आंदोलन करण्याची वेळ येऊ देऊ नका, असा इशाराही भुजबळांनी यावेळी दिला.