बांगलादेशातील अंतरिम सरकारला 100 दिवस पूर्ण:हिंदूंविरुद्ध हिंसाचार वाढला, युनूस विरोधकांना लक्ष्य करत आहेत

बांगलादेशातील मोहम्मद युनूस यांच्या अंतरिम सरकारने 16 नोव्हेंबर रोजी आपल्या कार्यकाळाचे 100 दिवस पूर्ण केले आहेत. ट्रान्सपरन्सी इंटरनॅशनल बांगलादेशने 18 नोव्हेंबर रोजी प्रसिद्ध केलेल्या अहवालात बांगलादेशच्या अंतरिम सरकारच्या राजवटीत हिंदूंविरुद्ध हिंसाचार वाढल्याचे म्हटले आहे. युनूस प्रशासन अल्पसंख्याकांवरील गुन्हे रोखण्यात अपयशी ठरले आहे. या अहवालानुसार, 5 ते 20 ऑगस्ट दरम्यान, अल्पसंख्याकांच्या विरोधात 2 हजारांहून अधिक गुन्ह्यांची नोंद झाली, ज्यामध्ये 9 अल्पसंख्याकांचा मृत्यू झाला. या प्रकरणांमध्ये गुन्हेगारांची ओळख पटवून त्यांना शिक्षा देण्यात सरकारचे दुर्लक्ष होत आहे. शेख हसीना यांचे सरकार पडल्यानंतर बांगलादेशात अल्पसंख्याकांवर विशेषतः हिंदूंवर हल्ले वाढले आहेत. या काळात दुर्गापूजा आणि अन्य धार्मिक कार्यक्रमांनाही लक्ष्य करण्यात आले आहे. या 100 दिवसांत बांगलादेशात 22 ठिकाणी सांस्कृतिक कार्यक्रम आणि क्राफ्ट अकादमींवर हल्ले झाले. या हल्ल्यांमुळे सांस्कृतिक कार्यक्रम आणि जत्रेवरही बंदी घालावी लागली. युनूस राजकीय विरोधकांवर निशाणा साधत आहेत राइट्स अँड रिस्क ॲनालिसिस ग्रुप (आरआरएजी) ने एका अहवालात म्हटले आहे की, युनूस प्रशासन शेख हसीनाच्या जुन्या सरकारपेक्षा फारसे वेगळे नाही. युनूस सरकारने देशातील अल्पसंख्याकांवर होणारे अत्याचार थांबवण्यासाठी कोणतीही कारवाई केलेली नाही. याशिवाय युनूस प्रशासन आपल्या राजकीय विरोधकांना लक्ष्य करण्यासाठी बळाचा वापर करत आहे. युनूस प्रशासनाने 1598 प्रकरणांमध्ये 2 लाखांहून अधिक लोकांना लक्ष्य केले आहे. यातील बहुतांश लोक युनूस यांचे राजकीय विरोधक होते. ऑगस्ट महिन्यापासून हिंदूंवर सातत्याने हल्ले होत आहेत बांगलादेशात शेख हसीना यांचे सरकार पडल्यापासून हिंदूंवरील हल्ल्यांची प्रकरणे समोर येत आहेत. देशात अनेक ठिकाणी हिंदू मंदिरांचे नुकसान झाले. काही दिवसांपूर्वीच चितगावमध्ये इस्कॉन संस्थेच्या सचिवासह 18 जणांवर देशद्रोहाचा गुन्हा दाखल करण्यात आला होता. चितगावच्या न्यू मार्केटमधील आझादी स्तंभावर राष्ट्रध्वजाच्या वर भगवा ध्वज फडकवल्याचा आरोप त्यांच्यावर होता. या ध्वजावर ‘सनातनी’ असे लिहिले होते. बांगलादेशातील हिंसाचारानंतर माजी पंतप्रधान शेख हसीना 5 ऑगस्ट रोजी भारतात आल्या होत्या. त्यांनी आपल्या पदाचा राजीनामा दिला होता. 22 ऑगस्ट रोजी अंतरिम सरकारने हसीना आणि त्यांच्या कुटुंबीयांचे डिप्लोमॅटिक पासपोर्टही रद्द केले होते. यानंतर 8 ऑगस्ट रोजी बांगलादेशात अंतरिम सरकार स्थापन करण्यात आले. नोबेल पारितोषिक विजेते मोहम्मद युनूस यांना या सरकारचे मुख्य सल्लागार करण्यात आले.