भारतीय आयुर्वेद संस्थेतर्फे राज्यस्तरीय धन्वंतरी पुरस्कारांचे वितरण:आयुर्वेदाला नवकल्पना, संशोधन व जागतिक भागिदारीची जोड द्यावी – तेलंगणाचे राज्यपाल वर्मा

आयुर्वेद ही प्राचीन भारतीय ज्ञानपरंपरा आहे. आधुनिक काळात या ज्ञानाला सातत्यपूर्ण संशोधन, नवकल्पना, जागतिक भागीदारी आणि कौशल्यपूर्ण विपणनाची जोड देणे आवश्यक आहे. त्यातून आयुर्वेद आणि निरामय मानवजीवन यांचे ध्येय साध्य होण्यास मदत मिळेल असे प्रतिपादन तेलंगणा राज्याचे राज्यपाल जिष्णु देव वर्मा यांनी केले. भारतीय आयुर्वेद संस्थेतर्फे आयोजित राज्यस्तरीय धन्वंतरी पुरस्कार सोहळा व आयुर्वेद संभाषा या विशेष कार्यक्रमात जिष्णू देव वर्मा बोलत होते. सेनापती बापट रस्त्यावरील सुमंत मुळगावकर सभागृहात आयोजित कार्यक्रमात भारतीय आयुर्वेद संस्थेचे अध्यक्ष वैद्य प्रशांत दौंडकर, सचिव वैद्य संकेत खरपुडे आदी उपस्थित होते. यावेळी वैद्यराज कै. विलास नानल यांचा आयुर्वेद रत्न (मरणोत्तर) सन्मान प्रदान करण्यात आला. आशुतोष नानल यांनी तो स्वीकारला. वैद्यराज सदानंद सरदेशमुख, वैद्यराज समीर जमदग्नी, वैद्य श्रृती जमदग्नी यांना जीवनगौरव पुरस्काराने, तर वैद्य विनय वेलणकर, वैद्य रामदास आव्हाड आणि वैद्य विनायक टेंभुर्णीकर यांना ‘आयुर्वेद गौरव’ पुरस्काराने सन्मानित करण्यात आले. जिष्णू देव वर्मा म्हणाले,आयुर्वेद मूळात स्वास्थ्यरक्षण कथन करणारा आहे. मात्र, काही कारणाने स्वास्थ्य बिघडले, तर ते पूर्वपदावर कसे आणायचे, यासाठीचे उपायही आयुर्वेद प्रभावीपणे सांगतो. मानवी शरीरासोबत मन, बुद्धी आणि आत्म्याचा विचार, हा घटक आयुर्वेदाला एकमेकाद्वितीय बनवितो. भारतीय आयुर्वेद संस्था विविध उपक्रमांतून आयुर्वेदाचे हे महत्त्व अधोरेखित करत आहे, हे उल्लेखनीय आहे. आयुर्वेदाचा प्रसार जागतिक पातळीवर होण्यासाठी सातत्यपूर्ण संशोधन, जागतिक भागीदारी आणि नवकल्पनामध्ये समतोल साधण्याची आवश्यकता आहे, तरच आपण निरामयतेकडे वाटचाल करू शकू असे ते म्हणाले. पूर्वार्धात धन्वंतरी सन्मानप्राप्त आयुर्वेद तज्ज्ञांच्या जीवनप्रवासातील संघर्ष, साधना आणि यशस्वी कहाणी जाणून घेण्याची संधी मिळाली. या अनुभवकथनांतून श्रोत्यांनी आयुर्वेदाचे सुवर्णक्षण अनुभवले. वैद्य जमदग्नी यांनी आयुर्वेद आणि फार्म्यूला, याविषयी, तर वैद्य सरदेशमुख यांनी कर्करोग संशोधनाविषयी विवेचन केले. वैद्य वेलणकर यांनी आधुनिक काळातील वैद्यांनी सर्व नव्या यंत्रतंज्ञांचा अवश्य स्वीकार करावा, मात्र आपल्या ज्ञानाची नैतिक बैठक अबाधित राखावी, असा सल्ला दिला. वैद्य आव्हाड यांनी आयुर्वेद तज्ञांसमोरील आव्हानांची माहिती दिली. वैद्य श्रृती जमदग्नी यांनी स्त्रीरोगतज्ञ म्हणून काम करताना आलेले अनुभव सांगितले. वैद्य विनायक टेंभुर्णीकर यांनी निमा या संस्थेच्या कार्याची माहिती सांगितली.