छत्रपती शिवाजी महाराज यांना देव बनवू नका – संभाजी ब्रिगेड:मंदिर बांधून दैवतीकरण नको, उद्धव ठाकरेंना टोला

मंदिर बांधून छत्रपती शिवाजी महाराजांचे दैवतीकरण करू नये. छत्रपती शिवाजी महाराज हे रयतेचे राजे होते. ते काल्पनिक नव्हते. मंदिर बांधून छत्रपती शिवाजी महाराजांच्या कार्यकर्तृत्वाचा चमत्कार घडवायचा नाही. मंदिरात चमत्कार घडतात. शिवरायांचा खरा इतिहास मंदिरातून समजणार नाही. उद्धव ठाकरे यांना छत्रपती शिवाजी महाराजांना चार हात दाखवून चमत्कारी पुरुष बनवायचे आहे का? संभाजी ब्रिगेड हे खपवून घेणार नाही. छत्रपती शिवाजी महाराज देव नव्हते हे सर्वांनी लक्षात ठेवावे, असे मत संभाजी ब्रिगेडचे प्रदेश प्रवक्ते संतोष शिंदे यांनी व्यक्त केले आहे. मंदिर बांधून पुजाऱ्यांचा प्रश्न सुटेल, शिवप्रेमींचा नाही मुंबईत आंतरराष्ट्रीय दर्जाच्या शिवस्मारकाचे काय झाले? १० वर्षांपासून विषय तसाच प्रलंबित आहे, तो मार्गी लावावा. महाराष्ट्रातील शिवप्रेमींना भावनिक करून चालणार नाही. मंदिर बांधून पुजाऱ्यांचा प्रश्न सुटेल, शिवप्रेमींचा नाही. शिवप्रेमी म्हणून मंदिर बांधण्याला आमचा विरोध असल्याचे शिंदे म्हणाले.