नवाब मलिकांकडून अजित पवारांवर स्तुतीसुमने:म्हणाले – अजित पवार मर्द माणूस, दिलेला शब्द पाळतात

राष्ट्रवादी काँग्रेसचे ज्येष्ठ नेते नवाब मलिक शिवाजीनगर माणखुर्द मतदारसंघातून निवडणुकीच्या रिंगणात आहेत. भाजपचा नवाब मलिक यांच्या उमेदवारीला विरोध होता. मात्र, अजित पवारांनी विरोधाला न जुमानता नवाब मलिकांना उमेदवारी दिली आहे. त्यानंतर आता आपण नवाब मलिक यांच्या प्रचाराला देखील जाणार असल्याचे अजित पवारांनी सांगितल्यानंतर नवाब मलिक यांनी त्यांच्यावर स्तुतीसुमने उधळली आहे. अजित पवार हा मर्द माणूस आहे, ते दिलेला शब्द पाळतात, अशा शब्दांत नवाब मलिक यांनी अजित पवारांचे कौतुक केले आहे. नवाब मलिक म्हणाले की, अजित पवार हा मर्द माणूस आहेत. दिलेला शब्द दादा पाळतात. आमच्या कठीण काळातही ते पाठीशी उभे राहिले आणि आम्हाला उमेदवारी सुद्धा दिली. आता महायुती आणि महाविकास आघाडी माझ्या विरोधात आहे. मात्र, जनता माझ्यासोबत आहे, असेही नवाब मलिक म्हणालेत. … तर अबू आझमींना जड जाईल
अबू आझमी यांनी नवाब मलिक यांचे जावई समीर खान यांच्यावर टीका केली होती. यावरून नवाब मलिक यांनी अबू आझमींना प्रत्युत्तर दिले आहे. माझा जावई समीर आता आमच्यासोबत नाही, पण त्याच्या बाबतीत असलेली केस आम्ही संपल्यासारखी मानणार नाही. कोर्टात आम्ही ती लढणारच, आणि त्याच्यावरचा कलंक पुसल्याशिवाय शांत बसणार नाही, असे म्हणत मलिक यांनी अबू आझमींवरही टीका केली. ते म्हणाले की, अबू आझमी मृत व्यक्तीबद्दल बोलत आहेत, जे चुकीचे आहे. मी जर बोलायला सुरुवात केली, तर त्यांना कठीण जाईल. त्यांच्या भावाचा मुलगा कोणाच्या साथीला आहे, इंटरनॅशनल ड्रग्ज माफियासोबत कोणाचा संबंध आहे, हे सगळे मी समोर आणू शकतो, असा इशारा मलिक यांनी अबू आझमींना दिला. आम्ही नवाब मलिकांच्या रॅलीत जाणार – अजित पवार
दरम्यान, नवाब मलिक यांचे दाऊदशी संबंध असल्याचा आरोप भाजपने केला होता. त्यामुळे भाजपकडून नवाब मलिक यांच्या उमेदवारीला करण्यात आला होता. मात्र, अजित पवार यांनी नवाब मलिक यांना उमेवारी दिली. त्यानंतर दाऊद आणि त्याच्या भावाच्या केसेसशी संबंध असलेल्या व्यक्तीचा आम्ही प्रचार करणार नाही, अशी भूमिका भाजपने जाहीर केली होती. तर, आम्ही नवाब मलिक यांना उमेदवारी दिली असून पक्षाचे घड्याळ चिन्ह देखील दिले आहे. त्यामुळे आम्ही त्यांच्या रॅलीमध्ये जाणार असल्याचे अजित पवार यांनी सांगितले. अजित पवार आपल्या प्रचारासाठी येणार असल्यामुळे नवाब मलिक यांनी त्यांचे तोंडभरून कौतुक केले.