पाकिस्तानात लष्कराच्या चौकीवर आत्मघाती हल्ला:12 जवान शहीद, कारमध्ये ठेवलेल्या स्फोटकांचा स्फोट; 6 दहशतवादीही मारले गेले

पाकिस्तानच्या खैबर पख्तूनख्वा प्रांतातील बन्नू जिल्ह्यातील लष्कराच्या चौकीवर मंगळवारी रात्री आत्मघाती हल्ला झाला. या हल्ल्यात 12 पाकिस्तानी सैनिकांचा मृत्यू झाला आहे. यात सहा दहशतवादीही ठार झाले आहेत. हे दहशतवादी एका वाहनातून चेक पोस्टवर हल्ला करण्यासाठी आले होते. पाकिस्तानी लष्कराच्या मीडिया शाखेने माहिती देताना सांगितले की, दहशतवादी हल्ला हाणून पाडण्यात आला. मात्र, दहशतवाद्यांनी चेकपोस्टच्या भिंतीवर वाहन घुसवून त्यात ठेवलेल्या स्फोटकांचा स्फोट केला. या स्फोटात 12 जवान शहीद झाले. प्रत्युत्तरादाखल लष्करानेही 6 दहशतवाद्यांचा खात्मा केला. हल्ल्यानंतर लष्कराने परिसरात संचारबंदी लागू केली आहे. शोध मोहीमही सुरू आहे. बलुचिस्तानमध्ये तीन दिवसांपूर्वी हल्ला झाला होता 16 नोव्हेंबर रोजी पाकिस्तानच्या पश्चिमेकडील बलुचिस्तान प्रांतात लष्कराच्या चौकीवर हल्ला करण्यात आला. या हल्ल्यात पाकिस्तानी सुरक्षा दलाचे 7 जवान शहीद झाले. बलुचिस्तान लिबरेशन आर्मी (BLA) या दहशतवादी संघटनेने या हल्ल्याची जबाबदारी स्वीकारली आहे. वृत्तसंस्था एएफपीने एका स्थानिक व्यक्तीच्या हवाल्याने सांगितले की, या हल्ल्यात 40 ते 50 बलुच बंडखोरांचा सहभाग होता. यादरम्यान बलुच बंडखोरांनी लष्कराच्या चौकीवर गोळीबार केला. या हल्ल्यात 7 जवान शहीद झाल्याशिवाय 15 जवान जखमी झाले आहेत. क्वेटा रेल्वे स्थानकावर झालेल्या हल्ल्यात 26 जणांचा मृत्यू झाला होता. पाकिस्तानमधील क्वेटा रेल्वे स्थानकावर शनिवारी सकाळी 9 नोव्हेंबरला स्फोट झाला. या स्फोटात 26 जणांचा मृत्यू झाला होता, तर 50 हून अधिक जण जखमी झाले होते. बलुच लिबरेशन आर्मी (BLA) या दहशतवादी संघटनेनेही या हल्ल्याची जबाबदारी घेतली आहे. बीएलएच्या प्रवक्त्याने सांगितले की, मजीद ब्रिगेड युनिटने हा आत्मघाती हल्ला केला आहे. त्यांचे टार्गेट इन्फंट्री स्कूलचे सैनिक होते, जे कोर्स पूर्ण करून जाफर एक्सप्रेसने पेशावरला जाणार होते. क्वेट्टा सिव्हिल हॉस्पिटलचे प्रवक्ते वसीम बेग यांनी पाकिस्तानी वृत्तपत्र द डॉनला सांगितले की, मृतांमध्ये 14 लष्करी जवान आणि 12 नागरिकांचा समावेश आहे.