पाकिस्तानात कॉलेजमध्ये रेप; विद्यार्थ्यांचे आंदोलन:शाळा-महाविद्यालये बंद; पोलिसांनी एका रक्षकासह 380 जणांना अटक केली

पंजाब, पाकिस्तानात विद्यार्थ्यांच्या आंदोलनाच्या पार्श्वभूमीवर सर्व शाळा आणि महाविद्यालये बंद ठेवण्याचे आदेश देण्यात आले आहेत. पंजाब कॉलेज फॉर वुमनच्या कॅम्पसमध्ये विद्यार्थिनीवर बलात्कार केल्याच्या आरोपानंतर पाकिस्तानमध्ये विद्यार्थी आंदोलन उफाळून आले आहे. पंजाब हा पाकिस्तानातील सर्वाधिक लोकसंख्या असलेला प्रदेश आहे. आता पंजाब प्रांताच्या गृह विभागाने शुक्रवार आणि शनिवारी लोकांना एकत्र येण्यास बंदी घातली आहे. शाळा आणि महाविद्यालये बंद केल्याने पंजाब प्रांतातील सुमारे 2.6 कोटी मुले आणि महाविद्यालयीन विद्यार्थ्यांच्या शिक्षणावर परिणाम होईल. रावळपिंडी पोलिसांनी सांगितले की, गुरुवारी शहरात निदर्शने करताना तोडफोड आणि जाळपोळ केल्याच्या आरोपाखाली 380 लोकांना अटक करण्यात आली आहे. सोशल मीडियावर उपलब्ध असलेल्या फोटो/व्हिडीओवरून पोलीस जाळपोळ करणाऱ्या विद्यार्थ्यांची ओळख पटवतील. विद्यार्थ्यांची निदर्शने आता लाहोरच्या वेगवेगळ्या कॉलेजांपासून रावळपिंडीसारख्या शहरात पसरली आहेत. रावळपिंडीत सुरू असलेल्या निदर्शनांवर पोलिसांनी अश्रुधुराच्या नळकांड्या फोडल्या आणि लाठीचार्जही केला. सोशल मीडियावर पोस्ट व्हायरल झाल्याने विद्यार्थी संतापले पोलिसांनी गार्डला अटक केली गेल्या आठवड्यात सोशल मीडियावर एक पोस्ट व्हायरल झाल्यानंतर विद्यार्थ्यांचे आंदोलन सुरू झाले. पंजाब कॉलेज फॉर वुमनच्या कॅम्पसमध्ये एका विद्यार्थिनीवर बलात्कार झाल्याची बातमी व्हायरल पोस्टमध्ये होती. या सोशल मीडिया पोस्टमध्ये दिसणाऱ्या एका सुरक्षा रक्षकालाही पोलिसांनी अटक केली होती. परंतु आतापर्यंत एकही पीडिता पुढे आली नाही आणि पोलिसांना या आरोपांची पुष्टी करता आलेली नाही. या प्रकरणावर पंजाब ग्रुप ऑफ कॉलेजेसचे लाहोर संचालक आरिफ चौधरी म्हणतात की, जर ही घटना खरी ठरली तर मी राजीनामा देईन आणि विद्यार्थ्यांच्या पाठीशी उभा राहीन. दरम्यान, सोशल मीडियावर खोट्या बातम्या पसरवणाऱ्यांना शिक्षा केली जाईल, असे पंजाबच्या मुख्यमंत्री मरियम नवाज शरीफ यांनी म्हटले आहे.