स्वारगेट बलात्कारप्रकरण; विजय वडेट्टीवारांचा गंभीर आरोप:म्हणाले – महायुती सरकार आरोपीला वाचवण्यासाठी पीडित मुलीवरच आरोप करताय

महायुती सरकार आरोपीला वाचवण्यासाठी पीडित मुलीवरच आरोप करत असल्याचा आरोप काँग्रेस नेते विजय वडेट्टीवार यांनी केला आहे. गृह राज्यमंत्री योगेश कदम यांनी घटनेसंबंधित केलेल्या एका दाव्यावर विजय वडेट्टीवार यांनी महायुती सरकारवर जोरदार हल्ला चढवला आहे. मंत्र्यांच्या मते त्या मुलीने विरोध केला नाही, म्हणजे या गुन्ह्याची जबाबदारी पीडित मुलीवर ढकलत आहे, असेही ते म्हणाले. विधान करताना मंत्र्यांनी थोडी लाज शरम बाळगली पाहिजे, असा घणाघात विजय वडेट्टीवार यांनी केला. गृह राज्यमंत्री योगेश कदम यांनी स्वारगेट बसस्थानक परिसरातील घटना फोर्सफुली घडलेली नसल्याचा दावा केला आहे. ते म्हणाले, घटना घडली तेव्हा आजूबाजूला लोक होते. आरडाओरड, हाणामारी न झाल्याने, तरुणीने विरोध न केल्याने कुणालाही शंका आली नाही. त्यामुळे आरोपी गुन्हा सहज करू शकला, असे गृह राज्यमंत्री योगेश कदम म्हणाले. यावरून विजय वडेट्टीवार यांनी महायुती सरकारवर हल्ला चढवला आहे. नेमके काय म्हणाले विजय वडेट्टीवार?
स्वारगेट बलात्कार प्रकरणातील आरोपीसोबत महायुतीचे नाते काय? आरोपीला वाचवण्यासाठी पीडित मुलीवरच महायुतीतील मंत्र्याकडून आरोप का? असा सवाल करत स्वारगेट बलात्कार प्रकरणात अजून आरोपी पकडला नाही, तरी गृहराज्यमंत्री योगेश कदम हे आरोपीला क्लिनचीट देत आहेत? असा प्रश्न विजय वडेट्टीवार यांनी उपस्थित केला. स्वारगेटमध्ये बलात्कार झाला आणि या मंत्र्यांच्या मते त्या मुलीने विरोध केला नाही, म्हणजे या गुन्ह्याची जबाबदारी त्या पीडित मुलीवर ढकलत आहे. विधान करताना मंत्र्यांनी थोडी लाज शरम बाळगली पाहिजे, असा घणाघात वडेट्टीवार यांनी केला. आरोपीला क्लिनचीट देण्यासाठी मंत्र्यांची इतकी घाई का?
आरोपीला शोधण्याऐवजी पीडित मुलीला दोष देऊन सिद्ध काय करायचं आहे? आरोपीला क्लिनचीट देण्यासाठी मंत्र्यांची इतकी घाई का आहे? राज्यातील महिलांना लाडक्या बहिणी म्हणून मिरवणाऱ्या युती सरकारची नियत इतकी खालच्या स्तरावरची असताना महिलांना सुरक्षित कसे वाटेल? आरोपी हा सत्ताधारी आमदाराचा कार्यकर्ता असल्याचे माहिती होताच महायुती मंत्रिमंडळाकडून आता बलात्कारी आरोपीची बाजू घेऊन त्याला वाचवण्यासाठी धडपड सुरू झाली आहे का? असे अनेक प्रश्न विजय वडेट्टीवार यांनी सरकारला विचारले आहेत. काय म्हणाले होते योगेश कदम?
स्वारगेट बस स्थानक येथे शिवशाही बस मध्ये एका 26 वर्षीय तरुणीवर सराईत गुन्हेगार दत्तात्रय गाडे याने बलात्कार केल्याचा प्रकार घडल्यावर गृह राज्यमंत्री योगेश कदम यांनी गुरुवारी स्वारगेट बस स्थानक येथे वरिष्ठ पोलिस अधिकाऱ्यांसोबत भेट देऊन पाहणी केली. त्यानंतर त्यांनी पत्रकारांशी संवाद साधला. ते म्हणाले, या घटनेमध्ये कुठलाही स्ट्रगल किंवा फोर्सफुल कृती झाली नाही. ही घटना घडली त्यावेळी शिवशाही बसच्या आजुबाजूला 10 ते 15 लोक होते. पण तरुणीने विरोध न केल्याने कोणालाही शंका आली नाही. त्यामुळे आरोपीला गुन्हा करता आला. आरोपी ताब्यात आल्यावर आणखी गोष्टी स्पष्ट होतील.