देवेंद्र फडणवीसांकडून संपूर्ण महाराष्ट्राचे पुन्हा एकदा अभिनंदन!:गेल्या 10 वर्षांतील विक्रमी परकीय गुंतवणूक आली केवळ 9 महिन्यात

मुख्यमंत्री देवेंद्र फडणवीस यांनी संपूर्ण महाराष्ट्राचे अभिनंदन केले आहे. गेल्या दहा वर्षातील विक्रमी परकीय गुंतवणूक केवळ 9 महिन्यात महाराष्ट्रात आली असल्याची माहिती त्यांनी दिली आहे. या संदर्भात त्यांनी केलेल्या एका पोस्टच्या माध्यमातून महाराष्ट्राने आतापर्यंतचे सर्व विक्रम मोडले असल्याचा दावा करण्यात आला आहे. मुख्यमंत्री देवेंद्र फडणवीस यांनी आपल्या पोस्टमध्ये लिहिले की, महायुती सरकारने आपलाच 2016-17 या आर्थिक वर्षाचा विक्रम मोडला आहे. विशेष म्हणजे चालू आर्थिक वर्ष पूर्ण होण्यासाठी आणखी एक तिमाही बाकी आहे. त्या आधीच महाराष्ट्रामध्ये विक्रमी गुंतवणूक आली असल्याचे फडणवीस यांनी म्हटले आहे. इतकेच नाही तर आपल्या पोस्टमध्ये मुख्यमंत्र्यांनी उपमुख्यमंत्री एकनाथ शिंदे, अजित पवार आणि मंत्रिमंडळाच्या नेतृत्वात महाराष्ट्राची घोडदौड अशीच सुरू राहील असा विश्वास देखील व्यक्त केला आहे. देवेंद्र फडणवीस यांनी केलेली पोस्ट देखील पहा… गेल्या 10 वर्षांतील विक्रमी परकीय गुंतवणूक
महाराष्ट्रात आली केवळ 9 महिन्यात !
केंद्र सरकारच्या डीपीआयआयटीने परकीय गुंतवणुकीचा डिसेंबर 2024 अखेरचा अहवाल जाहीर केला असून, गेल्या 10 वर्षांतील सर्वाधिक वार्षिक परकीय गुंतवणूक ही अवघ्या 9 महिन्यात महाराष्ट्राने प्राप्त केली आहे. 2024-2025 या आर्थिक वर्षातील पहिल्या 9 महिन्यात आतापर्यंत एकूण 1,39,434 कोटी रुपये इतकी परकीय गुंतवणूक आली आहे. ही गेल्या 10 वर्षांत महाराष्ट्रात कोणत्याही एका वर्षात आलेल्या परकीय गुंतवणुकीपेक्षा सर्वाधिक आहे.
असे करताना महायुती सरकारने आपलाच 2016-17 या आर्थिक वर्षाचा विक्रम मोडला आहे. अर्थात या आर्थिक वर्षातील एक तिमाही आणखी बाकी आहे.
संपूर्ण महाराष्ट्राचे पुन्हा एकदा मन:पूर्वक अभिनंदन!
माझे सहकारी उपमुख्यमंत्री एकनाथराव शिंदे, अजितदादा पवार आणि मंत्रिमंडळाच्या नेतृत्त्वात आपल्या महाराष्ट्राची ही घौडदौड ही अशीच कायम राहील.